ஆசிய கோப்பை கூடைப்பந்து தகுதி சுற்று: கத்தாரிடம் இந்தியா தோல்வி
சென்னை: ஆசிய கூடைப்பந்து தகுதிச் சுற்றில் ஏமாற்றிய இந்திய அணி 53-69 என கத்தாரிடம் தோல்வியடைந்தது.
சவுதி அரேபியாவில், அடுத்த ஆண்டு (ஆக. 5-17) ஆசிய கோப்பை கூடைப்பந்து 31வது சீசன் நடக்கவுள்ளது. இதற்கான தகுதிச் சுற்று நடக்கிறது. மொத்தம் 24 அணிகள், 6 பிரிவுகளாக விளையாடுகின்றன. ஒவ்வொரு பிரிவிலும் முதலிரண்டு இடம் பிடிக்கும் அணிகள் பிரதான சுற்றுக்கு தகுதி பெறும்.
‘இ’ பிரிவில் இடம் பிடித்துள்ள இந்திய அணி, முதலிரண்டு போட்டியில் கஜகஸ்தான், ஈரானிடம் தோல்வியடைந்தது. சென்னையில் நடந்த 3வது போட்டியில் இந்தியா, கத்தார் அணிகள் மோதின. இதில் ஏமாற்றிய இந்திய அணி 53-69 (14-17, 17-19, 8-14, 14-19) என்ற கணக்கில் தோல்வியடைந்தது. இந்திய அணிக்கு முயின் பெக் ஹபீஸ் (17 புள்ளி), பிரனவ் பிரின்ஸ் (13), சஹாஜி பிரதாப் சிங் (7) கைகொடுத்தனர்.
தொடர்ச்சியாக 3 தோல்வியை பெற்ற இந்தியா, ‘இ’ பிரிவில் 3 புள்ளிகளுடன் 4வது இடத்தில் உள்ளது. நவ. 25ல் சென்னையில் நடக்கவுள்ள 4வது போட்டியில் இந்திய அணி, மீண்டும் கஜகஸ்தானை எதிர்கொள்கிறது.
