கருணாநிதி சிலை – கணினி கல்வியகம் – திமுக தலைவர் ஸ்டாலின் திறந்து வைத்தார்

0

கருணாநிதி சிலை – கணினி கல்வியகம் – திமுக தலைவர் ஸ்டாலின் திறந்து வைத்தார்

சென்னை,

சென்னை கொளத்தூர் தொகுதியில் கணினி பயிற்சி மையம் தொடங்கி பெண்களுக்கு பயிற்சி மற்றும் வேலைவாய்ப்புகளை திமுக தலைவர் ஸ்டாலின் வழங்கி வருகிறார். இதேபோல் சைதாப்பேட்டை தொகுதியில் உள்ள பஜார் சாலையில் கலைஞர் கணினி கல்வியகம் அறக்கட்டளையை திமுக உருவாக்கியுள்ளது.

இதன்மூலம் அந்த தொகுதியை சேர்ந்த படித்த பெண்களுக்கு இலவச பயிற்சி அளித்து வேலைவாய்ப்பு கி டைக்க வழிசெய்யப்படும். இதற்கான திறப்பு விழா இன்று நடைபெற்றது.

அதேசமயம் சைதாப்பேட்டையில் கருணாநிதியின் மார்பளவு வெண்கல சிலையை திமுக தலைவர் மு.க.ஸ்டாலின் இன்று காலை திறந்து வைத்தார். இது 5 அடி உயர கிரானைட் தூண் மீது அமைக்கப்பட்டுள்ளது.

இந்த நிகழ்ச்சியில் திமுக பிரதிநிதிகள், மாணவர்கள், பொதுமக்கள் உள்ளிட்டோர் கலந்து கொண்டனர். இதில் பேசிய ஸ்டாலின், நடந்து முடிந்த உள்ளாட்சி தேர்தலில் திமுக கூட்டணி அதிமுக கூட்டணியை விட அதிக இடங்களில் வெற்றி பெற்றுள்ளது.

பின்னர் எப்படி இது சரிசமமான வெற்றியாக கருதப்படும். எது வளர்பிறை? எது தேய்பிறை? என்று நீங்களே புரிந்து கொள்ளுங்கள். திமுக வெற்றியால் வரலாறு மாறியுள்ளது.

ஏனெனில் ஆட்சியில் இருப்பவர்கள் தான் உள்ளாட்சி தேர்தலில் அதிக இடங்களில் வெற்றி பெறுவார்கள். அந்த வரலாறு இன்று மாறியிருக்கிறது. இதைவிட 2021 வரும் போது பாருங்கள்.

திமுகவின் பிரம்மாண்ட வெற்றியை காணப் போகிறீர்கள். கருணாநிதி மறைந்தாலும் நம்மை இன்றளவும் அவர் தான் இயக்கிக் கொண்டிருக்கிறார். அவர் விட்டுச் சென்ற பணிகளை நாம் தொடர்ந்து செய்ய வேண்டும்.

இதனை சபதமாக உறுதியேற்றுக் கொண்டு செயல்பட வேண்டும். இதனை வலியுறுத்தும் வகையிலேயே அவரது சிலை இன்று திறக்கப்பட்டுள்ளது. இந்த நல்ல நேரத்தில் கருணாநிதி பெயரிலேயே கணினி பயிலகம் திறந்து வைக்கப்பட்டுள்ளது.

இந்த நிகழ்ச்சிக்கு சிறப்பாக ஏற்பாடு செய்த மாவட்ட செயலாளருக்கு வாழ்த்துகளை தெரிவித்துக் கொள்கிறேன் என்று கூறினார்.